An energiezh nukleel, ar glaou hag an trevadoù OGK - Petra a soñj danvez-renerien ar Strollad Labour e Kembre?

Iolo ap Dafydd, Kelaouer an Endro evit BBC Kembre, zo bet o sellet ouzh barn an tri den a zo war ar renk evit bezañ dilennet rener ar Strollad Labour e Kembre, a-benn kompren gwelloc'h petra a soñjont eus an energiezh nukleel, eus dazont ar glaou hag eus an trevadoù OGK.

Edwina Hart, Carwyn Jones ha Huw Lewis eo an tri a zo war ar renk. Lavaret a reont o-zri e fell dezho lakaat an dilaoskadennoù karbon da zigreskiñ hag e fell dezho kaout ur politikerezh a-du gant an energiezh padus, met petra resis eo o soñj?

Gouarnamant Breizh-Veur zo war-nes sevel meur a greizenn nukleel nevez - en ur zianavezout barn ar bobl er wech-mañ, a-benn chom hep koll amzer. Huw Lewis zo a-du gant an energiezh nukleel hag a-du ma vefe savet ur mell chaoser a-dreuz ar stêr Hafren (Severn). Plijout a rafe dezhañ ma vefe dalc'het da gleuziañ glaou e Kembre, met n'eo ket a-du ma vefe mengleuzioù nevez war gorre an douar.

Carwyn Jones ivez a garfe gwelet ur greizenn nukleel nevez war Enez-Von ha kavout a ra dezhañ eo gwell implijout glaou Kembre kentoc'h eget emporzhiañ glaou eus a bell. Sevel a ra a-enep ar mengleuzioù war gorre an douar.

Edwina Hart, hag a zo Ministr ar Yec'hed, n'eo ket ken sur evit a sell ar gremm nukleel, dreist-holl dre ma chom kudenn petra ober gant an diatredoù skinoberius da zirouestlañ. A-du eo ma vefe kleuziet glaou, e mengleuzioù a bep seurt, ha gwell a se mar galler mirout ar c'harbon a vont en endro, emezi.

Edwina Hart ha Carwyn Jones zo a-enep an trevadoù OGK e Kembre; Huw Lewis avat en deus mar ha gallout a reer chom evel-se.

http://news.bbc.co.uk/welsh/hi/newsid_8350000/newsid_8351300/8351304.stm

Gortoz c’hoazh kent bezañ toullbac’het evit ar c’hembraeg

Gant al lez-varn ez eus bet divizet daleañ prosez Osian Jones, stourmer gant Cymdeithas yr Iaith (Kevredigezh ar C’hembraeg), ma vo ret dezhañ gortoz ouzhpenn pemzektez kent bezañ kaset d’an toull-bac’h.

Nac’het en deus Osian Jones paeañ un dell-gastiz ha frejoù a £1,120 goude bezañ barnet kablus a wall aozañ ar stalioù Boots ha Superdrug e Llangefni, Enez-Von. Al lezenn a lez ar stalioù bras d’ober fae war ar c’hembraeg evel ma karont. Lavaret e oa bet c’hoazh e rankje Osian tremen 28 devezh en toull-bac’h.

Bremañ e vo ret da Osian Jones bezañ el lez-varn ur wech c’hoazh, d’ar 25 a viz Du en dro-mañ, hag e-keit-se e klaskor kaout an arc’hant digant e c’hoprer, da lavaret eo Cymdeithas yr Iaith, rak eñ eo animatour ar gevredigezh en hanternoz.

Anat eo e tinac’ho Cymdeithas yr Iaith paeañ an dell-gastiz ha kondaonet eo bet diviz al lez evel unan kriz.

http://news.bbc.co.uk/welsh/hi/newsid_8340000/newsid_8347000/8347014.stm

Lazhadeg e Mervent Kembre a-benn miz Ebrel 2010

Abaoe pell ez eus politikourien e Kembre, anatañ en o zouez Elin Jones, kannad Plaid Cymru evit Ceredigion, o klask reiñ lañs d'ur raktres da lazhañ ar broc'hed e darn eus mervent ar vro.

Bep bloaz e vez kontammet saout laezh gant an dorzhellegezh, ar pezh a zegas kolloù bras d'al labourerien-douar. Hervez Elin Jones e voe ret kas 12,000 a vuoc'hed d'an distruj warlene abalamour d'an dorzhellegezh, padal ne oa nemet 7,000 e 1997. An disoc'h, hervezi, eo distrujañ ar broc'hed, rak dezho eo e tamaller skignañ ar c'hleñved.

Daoust ma'z eus bet emsavioù o klask difenn ar broc'hed, skoret gant skiantourien hag a gav dezho n'he devo ul lazhadeg efed padus ebet, ez eus bet divizet bremañ gan ar Vodadeg Vroadel e Kerdiz e vo tapet ha fuzuilhet ar broc'hed.

Pemp bloaz e pado al lazhadeg. Kregiñ a raio e miz Ebrel 2010 en hanternoz Sir Benfro (Pembrokeshire). Difennerien ar broc'hed avat a zo o c'houlenn e vefe sellet ouzh an diviz gant ur barner a-benn disklêriañ ha lezennel eo pe n'eo ket.

Lorraine Barrett, kannad gant ar Strollad Labour, ha Peter Black, kannad gant an Demokrated Frankizour, o doa pouezet war ar Vodadeg da heuliañ ur politikerezh brec'hiañ hepken. 'N'on ket evit krediñ ez eo reizh, nag a-fed ar skiant nag evit a sell ar moral, lazhañ ar broc'hed,' eme Lorraine Barrett. Hervezi e vefe kentoc'h ar sevel loened askoridik (intensif) ha doareoù fall d'ober war o zro pennañ kaoz ar gudenn.

http://news.bbc.co.uk/1/hi/wales/8343506.stm

http://www.flickr.com/photos/bara-koukoug/4032563330/

Prezegenn e brezhoneg en Aberystwyth

Herve ar Bihan,
kelenner e
Skol-Veur Roazhon II,
a raio ur brezegenn,
e brezhoneg,
diwar-benn
Stad ar Brezhoneg Hiziv,
d’ar merc’her
11 a viz Du,
da 7eur noz,
e Sal ar Yezhoù,
er Skol-Veur Gozh,
Aberystwyth.

Degemer mat d’an holl
Digoust mont e-barzh

Devezh studi evit ar re a zo o teskiñ brezhoneg hag emvod bloaz Kevredigezh Kembre-Breizh 2010

Dalc'het e vo un devezh-studi evit ar re a zo o teskiñ brezhoneg, hag evit ar re c'hoant ganto kaout tro da gomz brezhoneg, e Tŷ Siamas, Dolgellau, d'an 20 a viz C'hwever.

Kentelioù adalek 10eur betek 11 eur, ur banne kafe betek 1...1eur30 ha kentelioù betek1eur. Goude merenn e vo kentelioù etre 2eur ha 3eur hag emvod bloaz Kevredigezh Kembre-Breizh a vo dalc'het da 3eur30.

£8 evit ar c'hentelioù(evit an izili), £10 (evit ar re n'int ket ezel).

Dom Duff en Aberystwyth

Ar c'haner brezhoneg Dom Duff a vo o kanañ e Kreizenn an Arzoù, Aberystwyth, d'ar merc'her 2 a viz Kerzu da 8 eur noz.

Marteze e karfe ar re c'hoant ganto komz un tamm brezhoneg en em gavout er bar eno da 7eur20

Komz brezhoneg en Aberystwyth

Bez' en em vodimp er Blue Creek (en traoñ) d'ar yaou 29 a viz Du evit pakañ ur banne kafe - hag evit komz brezhoneg, anat deoc'h - da 2e30 goude merenn... Laouen omp o c'houzout e chomo Peggy amañ betek miz Ebrel da nebeutañ
Byddwn yn cwrdd yn y Blue Creek (yn y gwaelod) - Aberystwyth - ddydd Iau, 29 Tachwedd, 2009, am 2.30pm. Beth am ddod i siarad tipyn o Lydaweg?